Gjatë takimit, kryebashkiaku Sinaj bëri një panoramë të zbatimit të reformës territoriale në bashkinë Berat, si një reformë e suksesshme, e cila ka filluar të japë ndikimet e saj në zhvillimet lokale dhe rajonale.
Dragos Andrei, përfaqësues i Bordit të BERZH prezantoi mbështetjen e dhënë për Shqipërinë, kryesisht në sektorin energjetik dhe atë të bujqësisë.
“Vitin e kaluar investimet e BERZH në Shqipëri ishin ndër më të suksesshmet duke prekur një shifër prej rreth 170 milionë euro, në ristrukturimin e sektorit energjetik, në fushën e bujqësisë dhe mbështetjen për sipërmarrjet e vogla dhe të mesme”, theksoi Andrei.
Këtë vit, vijoi Andrei, BERZH do të vijojë programin e mbështetjes për Shqipërinë me fokus zhvillimin e turizmit dhe në këtë kuadër do të vlerësohen projektet, të cilat do të paraqiten nga bashkia e Beratit pranë ekipit menaxhues të projekteve të BERZH në Tiranë, të cilat do të kenë fokus mbështetjen për shërbimet publike në funksion të rritjes së turizmit dhe mbështetjen e sektorit të biznesit turistik.
Berati është zgjedhur si destinacion kulturor dhe historik për vizitën e Delegacionit, por gjithashtu për të diskutuar nga afër mbi programet e financimit që BERZH synon të zbatojë në një të ardhme të afërt në fushën e turizmit.
Gjatë takimit, u diskutua mbi disa fusha të ndërhyrjeve në sektorin e turizmit, duke theksuar përdorimin në maksimum të aseteve ekzistuese turistike dhe shtimin e atraksioneve të reja. Parku Kombëtar i Tomorrit, shtigjet turistike për ngjitje dhe alpinizëm në fshatrat rreth Beratit, krijimi i fermave turistike, nxitja e aktiviteteve sportive me fokus turizmin e aventurës dhe pa dyshim jetëzimi i Qendrës Historike, do të zgjasin kohëzgjatjen e qëndrimit të turistëve në Berat.
Më pas, delegacioni i BERZH vizitoi Kalanë e Qytetit dhe lagjet muzeale Mangalem dhe Goricë, duke u shprehur të entuziazmuar nga vlerat unike të Beratit dhe potencialet që ai ka për t’u kthyer në një destinacion turistik ndërkombëtar.
/afp.al/
