I tillë ka qenë reagimi i klubit Partizani, pas barazimit 1-1 në Shkodër, që i mogoi dy pikë dhe i dha mundësi Kukësit të afrohej sërish, për ta ndarë së bashku kreun e kalsifikimit.
Sipas reagimit të Partizanit, “Pak ditë më parë, shtypi i shkruar ka botuar me fakte, skuadrat më të favorizuara dhe më të penalizuara nga arbitrimi dhe aty dukej qartë në cilën anë qëndron F.K. Partizani. “Përveç kësaj, të gjithë keni mundësinë të ndiqni rastet e ndeshjes së luajtur në “Loro Boriçi”, të cilat, shumica prej mediave “harruan” t’i pasqyronin në emisionet sportive, ndoshta edhe për faktin se ato nuk janë raste “të diskutueshme”, por të pakundërshtueshme, që ndikojnë drejtpërdrejt në rezultatin teknik të një ndeshje futbolli,” – thuhej në reagimin e Partizanit.
“Nëse Federata Shqiptare e Futbollit e përdor në këtë mënyrë Komisionin Tekniko-Gjykues, në mënyrë që Presidenti i F.K. Partizanit të bëhet si ndonjë prej homologëve të tij, dhe që t’i bëj fresk institucionit të futbollit vend e pa vend, nga mëngjesi në mbrëmje, e ka shumë gabim....”
“Ne duam të fitojmë titullin dhe çdo ndeshje, duke luftuar në fushë, qoftë edhe kundër të gjithëve, por në një garë të ndershme, jo me allish-verishe të turpshme, me lloqe pazari, apo me përulje deri në neveri ndaj atij institucioni që në fund të fundit paguhet nga Ne vetë, “familja e futbollit” thjesht për të bërë një garë të ndershme.”
“Kjo nuk është një deklaratë e bërë në të nxehtë, pas një rezultati në fushë që nuk na shkon për shtat, JO. Kjo është një deklaratë, sepse shikojmë përsëri e përsëri që....:
“Na mohohen dy penallti flagrante në zonë, në SYTË e 3 arbitrave njëkohësisht (kryesor, i linjës, anësor), madje njëra prej tyre (ndaj Torrasës) meriton edhe kartonin e kuq.... dhe rezultati ishte 1-1. Nëse ju duhet shembulli, shikoni ku ka qenë topi në ndeshjen Shqipëri- Izrael, kur Berisha goditi me kokë kundërshtarin dhe u akordua 11-metërsh dhe karton i kuq...”
“Arbitrat që akordojnë me të drejtë penallti në favor të Partizanit “zhduken” nga qarkullimi, gjoja për t'u “ç'lodhur” për ndeshje të tjera, duke i dhënë të kuptojnë xhaketave të zeza që është sakrilegj ti japësh Partizanit atë që i takon.”
“Komisioni i Disiplinës vazhdon të marr vendime me gjobë për përsëritësit e akteve të dënueshme të tifozerisë në stadiume, ndryshe nga rasti i Partizanit që u dënua me 5 ndeshje pa tifozë në pjesën më të rëndësishme të garës...”
“Të nderuar zotërinj, jemi shumë të vëmendshëm për çdo gjë që ndodh në futbollin tonë, madje mbështesim edhe deklaratat e presidentëve, të tjerë të cilët kërkojnë DREJTËSI. Nëse FSHF e ka vendosur në zyrat e veta, kush duhet të fitojë, kush duhet të bjerë, kush jep më shumë vota e kush jep më pak, e ka shumë gabim. “
“F.K. Partizani është një familje e madhe, e bashkuar, me një tifozeri që ndodhet në çdo cep të Shqipërisë dhe në diasporë, prandaj meriton Respekt dhe Drejtësi. Gaboheni rëndë nëse mendoni se mund të lëkundemi në mendimin dhe dinjitetin tonë...”
/a.m/
