Studiuesit australianë kanë marrë në studim zakonet e gati një çerek milioni njerëzish të moshës 45 vjeçare por edhe më të vjetër, për një periudhë prej gjashtë vjetësh.
Në një raport të botuar në revistën e mjekësisë preventive, u tha se nuk kishte dallim të madh në probabilitetin e vdekshmërisë në mesin e atyre që e praktikojnë mënyrën e plotë vegjetariane të ushqimit, gjysmë të plotë (mish një herë në javë) ose "Pesco" (të bazuar në peshku), dhe atyre të cilët rregullisht hanë mish.
Studiuesit morën parasysh faktorë të tjerë, të tillë si mosha, pirja e duhanit dhe alkoolit, tensionin e lartë të gjakut, diabetin e tipit 2 dhe sëmundjet e zemrës.
Veganët kategorizohen gjithashtu si vegjetarianë.
Studimi gjeti se vegjetarianët nuk e kanë zakonin e pirjes së tepruar të duhanit dhe të pijeve, apo të jenë të trashë, dhe se ata gjithashtu kanë më pak mundësi të zhvillimit të kancerit apo sëmundjeve të zemrës.
"Është e rëndësishme të theksohet se lajmet nuk janë aq të këqia për vegjetarianët, sepse ata në thelb kanë një mënyrë jetese shumë më të shëndetshme se jovegjetarianët", thotë bashkautori i studimit Dr. Seema Mihrshahi, bashkëpunëtor i lartë shkencor në Universitetin e Sidneit.
Kjo konfirmohet edhe nga disa studime të mëparshme. Studiuesit nga Universiteti i Oksfordit, që në vitin 2013, publikuan një raport në të cilin gjetën se rreziku i hospitalizimit ose vdekjes nga sëmundjet e zemrës është për 32 për qind më i ulët për vegjetarianët.
Një numër në rritje i njerëzve në botë theksojnë se bëhen vegjetarianë për arsye të ndryshme, të tilla si mirëqenia e kafshëve dhe zvogëlimin e ndikimit negativ të njerëzimit mbi mjedisin. Vegjetarianizmi gjithashtu po bëhet trend i dukshëm në restorante, kafene dhe supermarkete.
/e.g/
