Policia e Tiranës ka arrestuar tre persona, dy prej tyre të shpallur në kërkim nga policia e Vlorës për prodhim dhe shitje të lëndëve narkotike, ndërsa personi i tretë u vu në pranga për përkrahje të autorëve.
Operacioni u zhvillua në zonën e Yzberishtit, ndërsa mes personave të arrestuar është edhe një 29-vjeçar, shtetas grek, por me banim në Sarandë.
Në pranga kanë rënë shtetasit Kaman Lumani, 28 vjeç, banues në Përmet; Anastazios Extadakstilios, 29 vjeç, shtetas grek, banues në Sarandë; Mariglen Coha, 26 vjeç, banues në Elbasan.
Gjatë kontrollit të ushtruar në banesën e marrë me qera nga shtetasi Mariglen Coha i dyshuar për veprën penale të “Prodhimit dhe shitjes së narkotikëve të kryer në bashkëpunim” dhe “Përkrahja e autorit të krimit”, ishin strehuar këta dy shtetas. Në cilësinë e provës materiale u gjet dhe sekuestrua një sasi rreth 1 kilogramë lëndë e dyshuar narkotike e llojit “Cannabis Sativa”, si dhe tre telefona celular. /e.g/
