Ky trofe fitohet nga Juventusi për të tretin vit radhazi nën drejtimin e Kontes dhe Alegrit dhe është i 12 në historinë e klubit torinez.
Gjithçka duket e lehtë për bardhezinjtë, të cilët kanë treguar forcën e tyre edhe në mbrëmjen e sotme duke shënuar dy gola me dy mbrojtës. Dani Alvesh i dha epërsinë torinezëve me një top që preku tokën para se të pushonte në rrjetën e Tomas Strakoshës.
Portieri i Kombëtares shqiptare në një formë të mirë por me një mbrojtje inekzistente, vuajti golin e dytë me Leonardo Bonuccin që praktikisht vrau shpresat e Lazios për trofe.
Strakosha mbrojti portën e Lazio në këtë finale, e para për të, dhe dhuroi pritje fantastike sidomos në pjesën e parë, por nuk mund të bënte asgjë në dy golat e juventinëve.
Juventus ngriti me meritë kupën e tretë radhazi dhe tani pret titullin në Serie A që mund të vijë në fundjavë, si dhe finalen e Champions në 3 qershor me Realin. /e.a/
