Një breshëri “kallashnikovi” i ka marrë jetën dy njerëzve të njohur në qytetin e Vlorës. Viktimat janë Roland Saliu, drejtor i OSSHEE-së në qytetin bregdetar dhe Ervent Hyseni, pronar i televizionit lokal “Vlora Channel”.
Atentati u krye mbrëmë, rreth orës 19:40, në qendër të qytetit, në një bar-kafe në Sheshin e Flamurit.
Nga plumbat ka mbetur i vdekur në vend drejtori Saliu, ndërsa Ervent Hyseni është plagosur rëndë dhe është dërguar në spitalin e qytetit, ku ka ndërruar jetë si pasojë e plagëve të marra.
Viktimat ishin ulur jashtë lokalit, ndërsa plumbat rrezikuan të kapnin shumë prej njerëzve të pranishëm në lokal dhe në rrugën që në atë orë është e frekuentuar nga kalimtarë të shumtë.
Nga të dhënat paraprake, dyshohet se atentatorët kanë vepruar të maskuar dhe janë larguar me shpejtësi, duke arritur të dalin nga qyteti. Një automjet i djegur është gjetur në fshatin Panaja dhe mendohet se u përkiste autorëve, që i kanë vënë vetë flakën mjetit për të zhdukur gjurmët.
Policia tha se ka ngritur pika kontrolli në qytet, me qëllim identifikimin dhe kapjen e autorëve.
Të dy viktimat ishin personazhe të njohur në qytetin e Vlorës, por dyshohet se dhe nuk është qartësuar ende se cili prej tyre ishte shënjestra e atentatorëve.
