Rrëfimin e saj, aktorja 50-vjeçare e bëri gjatë emisionit “The Daily Show” me Trevor Noah, ku tha me shaka se, fatmirësisht, miliarderi që drejton sot Shtetet e Bashkuara nuk ishte përpjekur ta prekte me forcë, siç pretendojnë gra të tjera se ka bërë me to.
“Isha në një shfaqje me të dashurin tim, - shpjegon Hayek, - kur Trump u afrua e më vendosi xhaketën mbi shpatulla, sepse e pa që kisha ftohtë. Ishte shumë i hijshëm në fillim, shumë i këndshëm. Më përshëndeti e u prezantua”.
“Pas kësaj, - rrëfen bukuroshja meksikane, - ai nuk tregoi ndonjë interes të madh ndaj meje, por nisi bisedimet me njeriun që kisha në krah, duke u përpjekur të miqësohej me të. E ftoi për darkë. Ne shkuam dhe gjatë të gjithë kohës ai fliste me të dashurin tim. Pastaj na ftoi në hotelin e tij në ‘Atlantic City’ dhe, pasi shkëmbyem numrat, nuk foli më kurrë me ish-in tim, por më mori mua në telefon e më kërkoi të dilnim bashkë”.
“Unë i thashë: çfarë po thua, po i dashuri im? Ti e di fare mirë që e kam një të tillë”.
Përgjigjja ishte: Ai njeri nuk është i mirë sa duket për ty. Nuk është i rëndësishëm. Ti duhet të dalësh patjetër me mua.
“Më mbyti me telefonata”, kujton Hayek. Por aktorja nuk ndryshoi mendje, edhe pse lidhja e dashurisë në të cilën ndodhej ndërkohë nuk ishte e konsoliduar e nuk zgjati shumë.
