Sot, në ditën e hënë të datës 10 të muajit korrik të motit të përvëluar 2017, gazetari ynë satirik, Tahir Avazi, ka intervistuar kryetarin e Partisë Demokratike, Lulzim Basha.
Lulzim Basha: Ja përse u godit ish-deputeti
***
Direkt pas ngjarjes në Burrel, ku u godit ish-deputeti Bedri Hoxha, "Antena Jashtë Familjes" u nis në vendngjarje dhe bisedoi me kreun e ngrirë të Partisë Demokratike, zotin Lulzim Basha. Atë e gjetëm si përherë, të ngrirë.
Tahir Avazi: Përshëndetje zoti Basha! Ç'ishte kjo që ndodhi?
Lul Basha: Çfarë ndodhi?
- Kjo pra, që u qëllua ish-deputeti, ndërkohë që ju ishit aty.
- Ku aty isha?! Kanë qëlluar? Kë kanë qëlluar? Përse e kanë qëlluar?
- Në fakt këto pyetje donim t'ua bënim neve.
- Unë e kam deklaruar, kam kohë. Jam i ngrirë. Ia kam thënë lexuesit tuaj. Si mund të ndjej, kur jam i ngrirë. Asnjë pjesë të trupit nuk ndjej. Për kokën e Saliut, po të gënjej.
- Kanë qëlluar ish-deputetin Bedri Hoxha...
- Kanë qëlluar Bedri Spahiun? Atë ish-Prokurorin e Përgjithshëm në kohën e diktaturës? Mirë ia kanë bërë. Kjo tregon që partia jonë është e distancuar nga e kaluara e poshtër komuniste. Ti nuk je dakord që Bedriun ta qëllojnë?
Ai qe një kriminel, pavarësisht se më vonë kërkoi falje. Krimet e tij...
- Po jo mor z.Basha, jo. Nuk qëlluan Bedri Spahiun. Qëlluan Bedri Hoxhën. Ish-deputetin e partisë suaj. Hoxhën, po ju them.
- Kanë qëlluar Hoxhën? Enver Hoxhën?
- Ju është mpirë truri fare e s'kuptoni, më duket.
- Epo i mpirë jam. Ngrirja i ka këto. Pastaj edhe nëse kanë qëlluar ndonjë Hoxhë, mirë kanë bërë. Ku shkon ai me atë mbiemër? A jemi parti që jemi distancuar nga Hoxha neve? Hë fol, jemi, a s'jemi?
- Ndonjëherë jeni z. Basha. Shkrihuni pak dhe kujtohuni, si ndodhi që qëlluan z. Bedri Hoxha?
- Tani po më kujtohet diçka nga ngjarja.
- Epo shyqyr z.Basha. A mund t'ia thoni edhe lexuesit tonë, ju lutem.
- Para takimit në Burrel, po bisedonim për Hollandën. Për jetën atje.
- Jetën tuaj?
- Jo vetëm timen. Jetën në përgjithësi. Atje emigrantët ndihen si në shtëpinë e tyre, thashë. Në atë moment u hodh ky Bedriu.
- E keni fjalën për z. Bedri Hoxha, dmth. Si u hodh? Çfarë tha?
- Po ik o Lul më tha, në Hollandë! Ç'bën këtu, boll lekë ke bërë...
- Në fakt, mirë ka thënë. Edhe unë i atij mendimi jam.
- E pse të iki unë?! Ja ika, po s'vij dot prapë.
- Nejse, vazhdoni ju lutem...
- E pse të shkojë Luli në Hollandë, u hodh edhe tha njëri që ishte pranë Bedriut. Të shkojë më mirë në Angli. Atje është më mirë. Ka gjithë ata burrelsa atje që kanë bërë prokopi, tha ky.
- Ua u tha juve këto llafe?
-Jo, jo, ia tha Bedriut. Aty plasi sherri. Jo Anglia është më mirë, thoshte njëri. Jo është Hollanda, thoshte ky Bedriu. E kështu plasi sherri.
- Kjo qenka arsyeja domethënë.
- Po pse, kujton ti se ne demokratët zihemi kot. Apo dëgjon atë Patozin ti që thotë që Luli ushtron presion. Unë jam i ngrirë. A ushtrohet presion kur dikush është i ngrirë. Unë mezi lëvizja kur isha sagllam, jo më tani që jam i ngrirë.
- Faleminderit z.Basha për shpjegimin!
- Faleminderit edhe rubrikës suaj dhe ty personalisht o zoti Tahir Avazi. Dhe vazhdo...!
- Sigurisht që do e vazhdoj avazin.
Rubrika e përditshme satirike e “Albanian Free Press”, “Antena Jashtë Familjes”, përgatitet nga Helidon Tahiraj
