Sipas policisë, që prej mesditës Kosta ndodhet në ambientet e komisariatit të Elbasanit, pas denoncimit që i ka bërë ish-bashkëjetuesja e tij.
E.T., 38 vjeçe ka deklaruar në polici se Hamit Kosta e kishte marrë me forcë në mjetin e tij dhe më pas e ka kërcënuar me armë. Pretendimet e gruas janë marrë në konsideratë nga hetuesit të cilët kanë marrë në pyetje ish-deputetin.
Më pas hetuesit kanë ballafaquar dëshmitë e dhëna nga të dy personat e përfshirë në këtë ngjarje dhe vendosën arrestimin, detajet e të cilit janë dhënë nga policia.
“Arrestimi i tij, u bë pasi në Lagjen ‘5 Maji’ me automjetin e tij tip ‘Hamer’ me targa PE2505A dyshohet të ketë kanosur me fjalë dhe me armë zjarri ish-bashkëjetuesen, shtetasen E.T., 38 vjeçe banuese në Elbasan.
Gjatë kontrollit të mjetit të 62-vjeçarit, grupi hetimor ka gjetur dhe sekuestruar në cilësinë e provës materiale, një armë zjarri pistoletë me gjashtë fishekë model 9mm të vendosur në krehësin e saj.
Arma e zjarrit së bashku me automjetin janë sekuestruar në cilësinë e provës materiale.
Materialet i kaluan Prokurorisë së Rrethit Gjyqësor Elbasan për veprime të mëtejshme për veprën penale “Kanosja” dhe “Prodhimi dhe mbajtja pa leje e armëve luftarake dhe e municionit” parashikuar nga nenet 84 dhe 278 të Kodit Penal”, deklaron zyrtarisht policia./l.k./
(Foto: Google)