Ky artikull është shkruar posaçërisht për gazetën “Albanian Free Press”
Pas humbjes së zgjedhjeve parlamentare dhe debatit të ashpër lidhur me fushatën për kryetarin e ri të partisë, PD-së i duhet një betejë politike për të vendosur veten në moto. Është gjëja më normale që një opozitë duhet të bëjë. Të nxjerrë mësime nga dështimet dhe të rimarrë pozicionin e luftëtarit, nëse do që të mbetet aktor dhe faktor politik njëkohësisht. Dhe PD-ja e nisi betejën e saj. Jo për mënyrën e qeverisjes së shumicës, as për ligjet e reformat që ndërmerr, as për ndonjë rast abuzimi apo shkelje flagrante si përçues i interesave të opinionit publik. Beteja që ka zgjedhur selia blu, është drejtuar për reformën zgjedhore, si nismë e parë për këtë mandat të ri parlamentar, dhe kur zgjedhjet më të afërta, ato vendore, janë më së paku pas dy vitesh.
Është, sidoqoftë, një nismë e re për një beteje të lënë përgjysmë, që gjatë mandatit të kaluar. Ndryshimet në Kodin zgjedhor dhe përmirësimet përkatëse, kanë qenë një detyrë e vjetër e OSBE-ODHIR, si pjesë e rekomandimeve drejtuar klasës politike, për t’i përmbushur për në rrugëtimin e integrimit për në BE. Këto detyrime nuk u përmbushën në katër vjet dhe këtu nuk ia vlen të merremi me arsyet e vërteta, pse nuk u arrit ndryshimi i ligjit. Me sa duket, askujt prej palëve nuk i interesonte përmirësimi konkret i kodit zgjedhor, dhe historitë me numërim elektronik a me votim emigrantësh, nuk ishin gjë tjetër, veç sebepe për t’i mbajtur gjërat nderë. Pasi, siç ka ndodhur rëndom në historinë e pluralizmit shqiptar, dy partitë kryesore nuk janë marrë ndonjëherë veçmas, thjesht, me kodin a sistemin elektoral. Në të gjitha rastet, ndryshimet e sistemit zgjedhor kanë qenë pjesë e një pakete më të gjerë marrëveshjesh, që kanë ndërmarrë liderët e partive kryesore.
Nëse këtë rregullim punësh me sistemin zgjedhor e marrim si trend, a mos, dhe në këtë rast, Basha kërkon një marrëveshje të re me Ramën? Në një debat kompleks brenda PD-së e ku autoriteti i Bashës është në kuotat më të ulëta, atij i duhet një lëvizje ku të evidentohet jo vetëm si përfaqësuesi i PD-së e lideri i saj, por edhe si figura që kundërshtari e respekton në një tryezë bisedimesh. Kryetari i PD-së është shprehur se marrëveshja me kryeministrin Rama, përpara zgjedhjeve, quhet e vdekur, megjithëse ministrat e tij bashkëqeverisën gati tre muaj me Ramën, si fitues zgjedhjesh. Gjithsesi, dhe nëse e quan marrëveshjen e pragzgjedhjeve të vdekur, kjo nuk hedh poshtë dëshirën për një marrëveshje të re, ndonëse në të njëjtat tema reference.
Bashës i intereson një fokusim i ri kamerash, ku ai del duke zbritur shkallët pas një bisede me kreun e shumicës. Dhe Rama nuk është çudi t’ia plotësojë këtë trill të vockël. Trill me anë të së cilit kryetari këmbëlëkundur i PD-së, do të fashisë debatin brenda kampit të vet, me imazhin e politikanit që po e imponon kundërshtarin për bisedime e marrëveshje. Trill i cili i vjen përshtat edhe vetë Ramës, pasi me Bashën në tryezë dhe LSI-në jashtë saj, i rikujton ish-aleatëve se, në vendimin e ndarjes, ata mbeten të humbur e të vetëm, pasi dhe në opozitë mbeten të përjashtuar nga koalicioni me Bashën.
Ndaj të gjitha debatet e tanishme, për beteja të reja apo për të drejta votash për emigrantët, duken shumë cinike kur qëllimi mbetet ndryshe. Takim e marrëveshje. Se sa të ngutura e të papërgatitura është nisma e ndërmarrë, duket dhe në faktin se idetë nuk i kemi ende të radhitura qartë si projekt në letër, por në formë deklaratash. Dhe absurdi shkon deri në idenë e hedhur si tym, për të rikthyer sistemin mazhoritar. Sistem që, ndonëse Rama bën sikur nuk e dëshiron, i shkon më përshtat PS-së dhe strukturës së saj elektorale. I shkon përshtat të fortëve, që do mbysin zonën elektorale me pará dhe influencë, çka i imponon partive politike të bëjnë pazare me këta skifterë lokalë.
Tymnajë që sidoqoftë, deri tani, ka mbetur në nivelin e deklaratave midis Palokës dhe Ballës. Ajo çfarë mbetet për të ditur, është nëse do të ketë një takim tjetër Rama- Basha, dhe cila do të jetë paketa përfshirëse në një marrëveshje të re të ngjashme me të parën.
Ndalohet rreptësisht ripublikimi i këtij shkrimi pa një leje të shkruar nga redaksia e Albanian Free Press
Shënim: Qëndrimet e shprehura në shkrimet e rubrikës Opinion, nuk përfaqësojnë domosdoshmërisht një vijë editoriale të Albanian Free Press