ALB
ENG
Në Konventën e djeshme të LSI-së, kryetarja, Monika Kryemadhi, tha se “kemi përballë një qeveri arrogante, qeveri e cila gjendet në kaosin e zullumit të ministrave të saj”.
Në këtë mënyrë, LSI u pozicionua qartë dhe prerë kundër qeverisë së Kryeministrit Edi Rama. Duke e konsideruar “të pamundur bashkëpunimin me Rilindjen”, në rezolutën e Konventës bie në sy fakti se “shigjetat” e sulmit janë përqendruar mbi Rilindjen, duke bërë kështu një dallim me Partinë Socialiste. “Bashkëpunim me socialistët e thjeshtë, por jo me Rilindjen”, thuhet në pikën e fundit të rezolutës së LSI-së.
“Do ta rrëzojmë shumë shpejt, në mënyrë shumë të shpejtë, çështje javësh këtë Kryeministër të degraduar”, tha kryetari i grupit parlamentar, Petrit Vasili.
Tetë pikat që përbëjnë rezolutën e Lëvizjes Socialiste për Integrim, që doli nga punimet e Konventës Kombëtare, janë:
- Mandatojmë Kryetarin e Partisë, Grupin Parlamentar dhe Kryesinë e LSI, që të jenë në krye të betejës për dekriminalizimin e politikës, të luftës së hapur ndaj krimit të organizuar dhe trafikut të drogës.
- Nuk do të pranohet asnjë aleancë me grupe apo individë në politikë, që kanë probleme me drejtësinë.
- Mbështesim plotësisht Kryetarin e Partisë dhe forumet drejtuese të LSI, që të drejtojnë Partinë në bashkëpunimin politik me parti, aktorë të shoqërisë civile e faktorë të tjerë politikë e shoqërorë të të gjitha niveleve,që janë të gatshëm për një opozitë të qartë e pa kompromis kundër qeverisë së Rilindjes. Bashkimi bën fuqinë!
- Aleancat antikrim dhe antidrogë nuk mund të pengohen kurrsesi nga asnjë ndasi ideologjike. Vendimmarrja politike e Kryetarit, e KDK dhe e Kryesisë të përshtatet në varësi të zhvillimeve konkrete politike në vend,por në asnjë rast të mos pranohet asnjë marrëveshje apo kompromis me bashkëpunëtorët e krimit të organizuar dhe drogës.
- Kanabizimi i vendit dhe vendosja e Shqipërisë në hartën e trafiqeve më të rrezikshme ndërkombëtare të drogës është projekti më kriminal me të cilin Rilindja nxiu e damkosi vendin. Konventa e denoncon njëzëri këtë projekt si antikombëtar, rrënues dhe të papranueshëm.
- LSI e ka propozuar dhe mbështet fort dhe pa asnjë hezitim heqjen e plotë të imunitetit për çdo zyrtar të shtetit! Të gjithë duhet të jenë të barabartë para ligjit!
- LSI do të mbështesë çdo prokuror, oficer të policisë gjyqësore apo gjykatës, që në bazë të ligjit kërkon të hetojë politikanë të cilitdo subjekt e grupim politik qofshin në maxhorancë apo opozitë.
- LSI e konsideron bashkëpunimin me Rilindjen si të pamundur. Ai është një grup në funksion të interesave të krimit e drogës, të provuara këto gjerësisht. Bashkëpunim me socialistët e thjeshtë, por jo me Rilindjen”.
