Gjithashtu përveç SHISH, edhe Agjencia e Inteligjencës dhe Sigurisë së Mbrojtjes ose i njohur ndryshe si ish-shërbimi ushtarak nuk ka ende një drejtues.
Helidon Bendo, u propozua nga kryeministri Rama për drejtimin e SHISH por Presidenti Meta ende nuk e ka dekretuar.
Ndërsa Agjencia e Inteligjencës së Mbrojtjes qëndroi prej dy muajsh pa drejtues, pas emërimit dhe dekretimit të Bardhyl Kollçakut si shef i Shtabit të Përgjithshëm të Ushtrisë.
Mësohet se, ministrja e Mbrojtjes Olta Xhaçka ka firmosur urdhrin për emërimin në krye të inteligjencës së ushtrisë kolonel Bardhyl Nuredinaj, i cili më parë ka qenë komandant në Qendrën e Personel Rekrutimit të Forcave të armatosura, raporton Top Channel.
Kolonel Nuredinaj i merr zyrtarisht funksionet e kreut të AISM-së ditën e mërkurë, më 15 nëntor, ndërkohë që me ndryshimin e ligjit në vitin 2014 shefi i AISM-së nuk emërohet dhe as shkarkohet më me dekret të presidentit, por ky atribut i takon vetëm ministrit të mbrojtjes, ndërkohë që e paqartë është se çdo të ndodhë me SHISH-in.
Kujtojmë që dy javë më parë Visho Ajazi Lika dha dorëheqjen nga kreu i SHISH ndërkohë që Rama e ka propozuar atë si ambasador të Shqipërisë në Nato.
/f.ç/Albanian Free Press Online/