Ankthi, si mund t’i përballojmë dhe menaxhojmë situatat e vështira

Ankthi, si mund t’i përballojmë dhe menaxhojmë situatat e vështira
Personat me çrregullim të ankthit, shqetësimet e zakonshme i marrin përmasa të mëdha dhe mund të zgjasin disa orë ose më shumë. Pa trajtim, çrregullimi i ankthit i përgjithësuar mund të vazhdojë për një jetë, në disa raste më i butë, në disa të tjera në paaftësi. Ndërhyrja në kohë është e rëndësishme për të mbrojtur dhe përmirësuar shëndetin. Cilat janë 9 këshillat lehtësuese të gjendjes së ankthit dhe si mund ta kalojmë atë

Sonila Isaku

Të gjithë njerëzit provojnë ankth në jetë, para apo pas situatave të caktuara, si një mënyrë pozitive për t’u mbrojtur, për sa kohë funksioni i tij nuk bëhet pengesë për funksionimin dhe mirëqenien psikofizike të individit. Ankthi karakterizohet nga tipare psikologjike të sjelljes, aq sa dhe fiziologjike. Mundohuni t’i përgjigjeni këtyre pyetjeve: A ndjeni paaftësi për tu qetësuar? A keni ndjesinë e lodhjes ose lodheni shpejtë? A keni vështirësi në përqendrim ose bllokim të mendjes? A irritoheni vazhdimisht? A ndjeni tension muskulor? A keni shqetësime të gjumit?

Nëse përgjigjja juaj është PO, për pjesën më të madhe të këtyre pyetjeve, jeni duke shfaqur disa nga shenjat e ankthit të përgjithësuar. Ai është shqetësim dhe mërzi e vazhduar, e tepruar dhe jo realiste, mbi pothuajse të gjitha rrethanat jetësore, që shoqërohet me një ndjenjë mungese kontrolli dhe një vigjilencë të lartë, ndaj çdo stimuli të lidhur me situatat kërcënuese.

Situatat

Cilido nga ne mund shqetësohet për gjëra më pak të rëndësishme, si të qenit në kohë për një takim, për punë ose në shkollë, për familjen, për të ardhmen për gjithçka. Por në rastin e personit me çrregullim të qnkthit të përgjithësuar, këto shqetësime marrin përmasa të mëdha dhe mund të zgjasin disa orë ose më shumë. Një tjetër aspekt i çrregullimit të ankthit të përgjithësuar, është fokusimi në skenarët e mundshëm: Të mendojnë për çdo gjë që mund të ndodhë në të ardhmen. Këto mendime përqendrohen në ngjarjet negative që mund të ndodhin atëherë kur ju filloni të mendoni me frikë për to. Për shembull: “Në qoftë se unë qëndroj bllokuar në trafik dhe mbërrij vonë për punë? Shefi mund të jetë mërzitur me mua dhe unë mund të humbas punën dhe nuk do të arrij të gjej një punë tjetër? Gjendja e familjes time do të përkeqësohet”, e të tjera si këto.

Çrregullimi i ankthit të përgjithësuar mund të jetë shpesh shoqërues i çrregullimeve të tjera si, çrregullimet e humorit, çrregullime psikotike apo i problemeve të tjera shëndetësore. Po ashtu, mund të shoqërohet dhe me probleme ekonomike sociale. Zakonisht, nëse simptomat vazhdojnë për më shumë se gjashtë muaj, është e mundshme që kemi të bëjmë me çrregullim ankthi të përgjithësuar.

Trajtimi

Pa trajtim, çrregullimi i ankthit të përgjithësuar mund të vazhdojnë për një jetë, në disa raste më i butë, në disa të tjera në paaftësi. Ndërhyrja në kohë është e rëndësishme për të mbrojtur dhe përmirësuar shëndetin. Flisni me një specialit, nëse ndjeni se i keni këto shqetësime.

 

Këshilla

Më poshtë, do të gjeni disa teknika relaksuese në kushtet e shtëpisë, për qetësim pas përjetimit të situatave stresuese dhe tensionuese. Ushtrimet fizike të përditshme në kushte shtëpie, na ndihmojnë të metabolizojmë adrenalinën, të ulim reagimet e ankthit dhe të rrisim ndjesinë e të ndjerit mirë.

 

  1. Frymëmarrja e thellë është metodë tejet efektive, për të hyrë në një gjendje të relaksuar.
  2. Relaksimi progresiv është teknikë e relaksimit të shpejtë, e cila arrihet kur ju shtriheni në shpinë dhe mbyllni sytë dhe si rrjedhojë ndjeni peshën e trupit. Gradualisht, tensioni bie dhe trupi e mendja kur të zgjoheni, do të jenë të relaksuara.
  3. Vizualizimi imagjinativ është ajo teknikë e cila redukton stresin dhe ankthin kur e lini imagjinatën të rrjedhë plotësisht, qetë dhe pa ngarkesa. Po ashtu, për t’u relaksuar ta udhëhiqni imagjinatën tuaj në objekte që vërtet sjellin relaks si plazhet dhe deti, fotografitë, zërat dhe muzika e qetë.
  4. Numërimi ka shumë kohë që njerëzit e përdorin numërimin për t’u relaksuar dhe për të fjetur. Kjo teknikë është treguar të jetë efektive, andaj edhe ne e propozojmë. Numëroni qetë, symbyllur, nga 1 deri në 100 dhe lëreni që mendja të çlirohet nga ngarkesat. Ndërpriteni numërimin kur të vijë relaksimi, dremitja dhe gjumi.
  5. Muzika e këndshme është metodë tejet efikase relaksi. Gjeni një këngë apo melodi të qetë dhe dëgjojeni duke përdorur njëherësh përfytyrimin për gjërat të cilat flet kënga.
  6. Ecja, shëtitjet tejet efektive për t’u qetësuar, minimumi 30 minuta në ditë. Gjithashtu, zgjidhni një vend që ju pëlqen, merrni pak gjëra të nevojshme dhe qetësohuni bashkë me natyrën që keni para dhe rreth vetes. Shëtitjet mund t’i shfrytëzoni edhe për relaksim psikofizik, përkatësisht për të luajtur apo për t’u marrë me aerobi.
  7. Meditimi përfshin çdo veprimtari që ndihmon për të mbajtur vëmendjen në qetësi në momentet tij. Meditimi është në njëfarë forme edhe “prehje”.
  8. Masazhi është një mënyrë tjetër e relaksimit, shumë efektiv, i cili përfshin shtendosjen muskulore përmes ushtrimeve dhe lëvizjeve të gjymtyrëve të caktuara të trupit si, qafës, këmbëve, duarve etj.
  9. Gjumi Përcaktimi i një orari gjumi, për çdo natë dhe zgjimi gjithashtu në orar. Krijimi i një atmosfere komode në dhomën e gjumit, një dush të ngrohtë para tij, një libër për të shfletuar disa faqe, larg televizorit, larg internetit. Ushtrime para gjumit, numërim mbrapsht nga 50 deri 1, 2 deri në 3 herë.

Gjithashtu, ndihmon aktivizimi në punët e shtëpisë, në kujdesin për veten, higjienizimin, etj. Këto dhe shumë teknika të tjera mbi relaksimin, janë të vlefshme vetëm nëse aplikohen në çdo situatë, sado e vështirë të jetë ajo.

 

Shpërndajeni me miqtë tuaj: