Operacion antikanabis në kryeqytet, tre në pranga

Tre persona janë arrestuar gjatë natës në një operacion antidrogë në kryeqytet.

Policia tha se janë arrestuar Bashkim Joca, 46 vjeç, Albi Joca , 19 vjeç dhe Mirel Joca, 18 vjeç, të tre banues në fshatin Shëngjergj në Vakumonë, Tiranë.

“Në bashkëpunim me njeri-tjetrin, ata kryenin aktivitetin e kundërligjshëm të shitjes së lëndëve narkotike të dyshuar të llojit kanabis sativa në sasi të konsiderueshme, personave të ndryshëm në zonën e Saukut, Berzhitës, Kllojkës, etj”, tha policia.

Tre personat janë arrestuar tek vendi i quajtur “Gurorja e Kllojkës”, teksa lëviznin me automjetin, “Renault Laguna”, me targë AA 232 FI.

“Në bagazhin e automjetit të tyre ndodheshin disa thasë të zinj dhe të bardhë të mbushur me material bimor të thatë ngjyrë jeshile, e dyshuar si lëndë narkotike e llojit kanabis sativa, me peshë 65,6 kg”, tha policia.

Në kërkim është shpallur një person me iniciale P.L. /a.a/ Albanian Free Press Online/