"Antena Jashtë Familjes" hapet me një lajm tepër të mirë, për banorët tiranas në përgjithësi, e për gjithë shqiptarët në veçanti. Para disa ditësh, u miratua për t'u ndërtuar një godine e lartë, afër Bankës.
Objekti do të quhet, "Sytë e Tiranës". Shprehim kënaqësinë për këtë vepër që do i shtohet qiellit tonë të kryeqytetit. Na vjen mirë që, kjo ndërtesë është nga të vetmet që mban një emër kaq domethënës, në gjuhën e bukur shqipe.
Të gjithë ata që e kundërshtojnë ndërtimin e saj, e kanë nga zilia. Siç do thoshte populli ynë: E kanë halë në sy! I plaçin sytë, kush nuk e do ndërtesën "Sytë e Tiranës"!
Kur të mbarojë kjo godinë, nuk do ketë sy e faqe, asnjë i varfër i Tiranës, të ankohet. Madje as ata që dalin e kërkojnë punë te Partizani i Panjohur, s'do kenë gojë të flasin.
Le të hipin në majë të godinës së re, e të shikojnë nga lart makinat e Bankës.
E nëse nuk shikojnë lekë edhe nga aty lart, s'ua ka fajin qeveria, por qorrëllia e tyre. Ti plasin sytë mirë! - siç i thonë vlonjatët. E meqë ra llafi te Vlora. Rubrika jonë ka mësuar se, përzgjedhja e shokut Erion Veliaj si një nga tre Kryebashkiakët Inovativë në fushën e Teknologjisë së Informacionit ka bërë që Kryebashkiaku i Vlorës të ndihet keq, e të kundërveprojë ashpër.
Së pari, ju shpjegojmë fjalën, "inovative". Kjo do të thotë që, Kryebashkiaku i Tiranës ka bërë ndryshim cilësor, ka sjellë gjëra të reja në atë fushë.
E përkthyem, jo se ju nuk e dini se ç'ka bërë shoku Erion Veliaj, por thjesht sepse, neve si rubrikë, nuk dëshirojmë të përdorim shumë fjalë të huaja.
Kthehemi te Kryebashkiaku i Vlorës, shoku Dritan Leli. Nëpërmjet disa spiunëve tanë, morëm vesh se, ai ju kishte thënë disa miqve të tij, se do t'i thyente "stolat inteligjentë", të cilat i vendosi në shëtitoren buzë detit, apo siç i thonë në shqip, në Lungomare.
Ne e telefonuam dhe kryem me të këtë bashkëbisedim, në dialektin lab.
Ja bashkëllafosja e çiltër, bërë me të:
Antena: Përshëndetje, shoku Dritan! Morëm vesh që keni qënë i mërzitur shumë dhe keni dashur të thyenit stolat që keni vëndosur në...
Dritan Leli: E vërtetë është. U bëra keq kur e mora vesh. Mos gjetsha njeri në Bashki, nëse të gënjej. Edhe nashti ashtu jam.
Antena: Përse u ndjetë keq? A mund të na i shpjeg...?
Dritan Leli: Si përse, o vëlla! Ai i pari i Ankarasë, nuk më dha çmim mua, e i dha Erionit. Ç'ka bërë Erioni në Tiranë për teknologjinë, di gjë zotrote? Një vërë në ujë ka bërë! Unë vendosa alamet stolash, që ngarkohen me energji nga dielli...
Antena: Ne si rubrikë, kemi folur për ato stola dhe për...
Dritan Leli: Eeee, keni folur ju, por s'kanë folur të tjerët për ato të Erionit. Nuk i thotë tamam gjërat "Media e Kazanit", se ja u gufosë gojën me lekë ai, ndaj.
Antena: Cilat gjëra p.sh.? A mund ta dimë ne, e t'ia themi lexuesit...?
Dritan Leli: Ai premtoi para 10 muajve, në muajin shkurt, që brenda vitit do të vendoste bileta elektronike, për autobusët urbanë. Hë, e mban mend zotrote? Nëntë muaj i duhen fëmijës të dalë mjekësisht. 10 muaj, nuk i dolën Erionit për të nxjerrë biletë elektronikisht.
Antena: Nuk i ka bërë?! Po ky qenka lajm i thënë ekskluzivisht për mua. Unë mendoja se ai i kishte vendosur. Ju si me...?
Dritan Leli: I vendosi, lesh! Shko nëpër autobusë, o vëlla, e do i shikoshë. Ai të gënjen të shuan. Ai po më bën edhe mua si vetja e tij.
Antena: Atëherë, përse ai Kryebashkiaku i Ankarasë, çmimin ja dha Erionit dhe e nuk ja u dha juve?!
Dritan Leli: Ja ta thom unë, se përse! Ankarasit i kanë inat stambollasit dhe vlonjatët, o vëlla.
Antena: E di që jam aguridhe e nuk i kuptoj këto gjërat politike. E përse ankarasit, d.m.th. banorët e Ankarasë, i kanë inat...?
Dritan Leli: Na kanë inat, o vëlla, meqë Stambolli dhe Vlora kanë qënë kryeqytete, përpara se të bëhej kryeqytet Ankaraja. Nëse çmimin do e jepte i pari i Stambollit, jam i sigurtë që do ma jepte mua. Ne vlonjatët kemi patur lidhje të vjetra me Stambollin, por jo me Ankaranë.
Stambollasit më kanë qejf mua. Ankarasit kanë qejf Erionin...