Prokuroria për Krime të Rënda ka urdhëruar ndalimin e efektivëve të Drejtorisë së Policisë së Kufirit dhe Emigracionit, Durrës, Gëzim Dervishi dhe Agron Kapllani.
I njëjti urdhër është lëshuar edhe për doganierin Altin Katundi, si dhe për agjentin doganor Mikail Hila.
"Nga hetimi i Prokurorisë për Krime të Rënda, është evidentuar se, për kalimin e kamionit të ngarkuar me 2.5 ton lëndë narkotike në janar 2017, janë krijuar kushtet nga zyrtarë publikë, të cilët kanë mundësuar kalimin lirisht të kamionit nga porti i Durrësit deri në portin Ankona në Itali”, thuhet në njoftimin e organit të akuzës.
Një ditë më parë, policia njoftoi arrestimin e një oficeri të lartë policie, i cili konsiderohet në rolin e organizatorit, i dyshuar si përgjegjës për trafikimin e 2.5 ton lëndë narkotike kanabis nga porti i Durrësit në drejtim të Italisë, ngjarje e ndodhur në janar 2017.
Kamioni i bllokuar në Itali drejtohej nga Dhimo Koraj.
Deri tani, të arrestuar si pjesë e grupit kriminal figurojnë Demo Progonati, Euron Hoti, Malton Lleshi dhe Aurel Lazaj, të cilët po hetohen me masë e sigurimit arrest në burg.
Ndërsa një urdhër ndalimi është nxjerrë për Festim Lelaj, nënkomisar në Komisariatin e Fierit, Skënder Siceqa dhe Arbi Mustafa, të cilat janë ekzekutuar nga policia një ditë më parë. /a.a/ Albanian Free Press Online/
Foto: Guardia di Finanzia