Mesfushori me tipare sulmuese Argjent Gafuri është pranë firmës me Flamurtarin. Bëhet fjalë për një mesfushor 28-vjeçar nga Tetova, i cili luan si fantazist, por edhe në të dy krahët e sulmit. Ai ka mbërritur pasdite në Vlorë e pritet të firmosë nesër me Flamurtarin.
Pas afrimit të sulmuesit Nedeljkoviç dhe mesfushorit me tipare sulmuese Muarem, klubi vlonjat kërkon përforcime të tjera në mesfushë e sulm. Dëshira e madhe e merkatos është ajo e Dejvi Bregut, i cili është bllokuar aktualisht nga Luftëtari.
Luftëtari mban vendin e dytë, 9 pikë pas Skënderbeut dhe kërkon që pas janarit të mbajë këto pozita, pse jo të konkurrojë me kryesuesit e momentit për titullin kampion.
Sakaq në Shkodër ka pasur zhvillime të rëndësishme, por jo shumë premtuese për të ardhmen e Vllaznisë. Këshilli Bashkiak i Shkodrës miratoi buxhetin që i akordon 550 milionë lekë të vjetra ekipit për vitin që vjen. Por në muajin prill pritet afrimi i presidentit të ri të klubit. Ish-presidenti Valter Fushaj u shpreh i gatshëm të merrte ekipin në janar, për ta ndihmuar që të mos rrezikojë rënien në një kategori më poshtë.
/a.m/