ALB
ENG
Ky artikull është shkruar posaçërisht për gazetën “Albanian Free Press”
Kur u pyet në një studio televizive se çdo të ndodhë nëse ndërkombëtarët do t’i njohin zgjedhjet lokale edhe pa pjesëmarrjen e PD-së, Edi Paloka, nënkryetari i saj, vuri këtë bast personal publik: “Zgjedhjet lokale nuk do të zhvillohen dot pa opozitën. Përndryshe largohem nga politika”. Në një studio tjetër, Edmond Spaho, nënkryetari tjetër i PD-së, nuk vuri një bast personal publik, por e bëri më të qartë synimin strategjik të PD-së. “Zgjedhje në qershor nuk do të ketë. Ndërkombëtarët duhet të parandalojnë përshkallëzimin e situatës”, - tha ai. Ndërsa kryetari Basha, në një studio tjetër televizive, përmendi togfjalëshin “përplasje parapolitike”. Ai tha: “Ne jemi sot në një pikë përplasjeje pa kthim, dhe kjo përplasje do të marrë përmasa parapolitike, në qoftë se nuk zgjidhet me të vetmen rrugë që ka parashtruar opozita (largimin e Ramës para zgjedhjeve)”
Një sintezë e këtyre deklaratave publike (si edhe të të tjerave që kanë bërë eksponentë të opozitës, si Bogdani, Vasili, etj.) ravijëzon strategjinë e opozitës. Meqë Rama dhe të tijët nuk janë tutur deri më sot nga djegia e mandateve dhe protestat e opozitës, kanceleritë perëndimore mund t’i tuten destabilitetit që mund të sjellë bojkoti “parapolitik” i zgjedhjeve lokale të 30 qershorit nga ana e opozitës. Sipas kësaj logjike, përplasjet civile ditën e zgjedhjeve, mes votuesve të PS-së dhe militantëve bojkotues “parapolitikë” të opozitës, mund të krijojë destabilitet dhe një eksod të ri azilantësh drejt Europës. Dhe këtë gjë Europa dihet që nuk e dëshiron…
Ngjashëm me bastet e ndeshjeve të futbollit, edhe ky bast i opozitës ka tre skenarë, secili me probabilitetin e vet.
Skenari A –30 qershori me pak incidente
Pavarësisht deklaratave të opozitës, kanceleritë mbeten tek qëndrimi i derisotëm. Ato njëzëri kanë bërë thirrje që zgjedhjet lokale të zhvillohen më 30 qershor, dhe që konkurrentët e mundshëm të marrin pjesë në to. Zgjedhjet zhvillohen në 30 qershor, ku garojnë kandidatët e PS-së kundër atyre të partive të vogla ose të pavarurve. Nga gara dalin fitues në shumicë dërrmuese të parët. Pavarësisht nga disa incidente në qendra të ndryshme votimi, kanceleritë perëndimore i njohin zgjedhjet si legjitime, duke përmendur mangësitë e vërejtura aty-këtu.
Nëse ngjarjet rrjedhin kështu, PD-ja kthehet përfundimisht në një parti jashtë sistemit (largohet nga bashkitë që qeveris aktualisht). Sidoqoftë, mbetet me një përkrahje të fortë në sinorin e vet tradicional elektoral. Problem do ta kenë LSI-ja dhe partitë e vogla satelite të PD-së, të cilat mund të humbasin përkrahësit në bashkitë ku kanë aktualisht një farë pushteti…
Skenari B – 30 qershori me shumë incidente
Pavarësisht deklaratave të opozitës, kanceleritë mbeten tek qëndrimi i derisotëm. Ato njëzëri kanë bërë thirrje që zgjedhjet lokale të zhvillohen në 30 qershor, dhe që konkurrentët e mundshëm të marrin pjesë në to. Zgjedhjet zhvillohen në 30 qershor, ku garojnë kandidatët e PS-së kundër atyre të partive të vogla ose të pavarurve. Nga gara dalin fitues në shumicë dërrmuese të parët. Por incidentet janë të shumta dhe të përhapura në të gjithë territorin. Kanceleritë perëndimore nuk i njohin zgjedhjet si legjitime, duke përmendur incidentet e shumta gjithandej.
Nëse ngjarjet rrjedhin kështu, dy vjetët e ardhshme do të jenë shumë të vështira për Edi Ramën. I ndodhur nën shigjetimin e vazhdueshëm të kancelerive perëndimore dhe të opozitës, ai do ta ketë shumë të vështirë të marrë 48% të votave më 2021, siç mori në 2017-ën…
Skenari C – Kanceleritë perëndimore ndërhyjnë para 30 qershorit
Për t’i paraprirë skenarit B, kanceleritë perëndimore mund të ndërhyjnë para 30 qershorit, duke ofruar një zgjidhje të mesme. Ato mund t’i kërkojnë opozitës të marrë pjesë në zgjedhjet lokale, me kushtin që Rama ta lërë postin e kryeministrit para zgjedhjeve parlamentare të radhës. Një model që mund të merret si shembull është ai i Greqisë, ku kryetari i gjykatës së lartë merr drejtimin e qeverisë para zgjedhjeve, ndërsa drejtimin e ministrive e marrin teknokratë të përzgjedhur me konsensus. Ose mund të zgjidhet një model tjetër alternativ.
Nëse ngjarjet rrjedhin kështu, PS-ja mund të fitojë përsëri shumicën e bashkive në zgjedhjet lokale - opozita nuk është përgatitur realisht për to. Sidoqoftë, PS-ja mund të humbasë zgjedhjet parlamentare në 2021. Në fund të fundit, po bëhet rutinë rrotacioni një herë në 8 vjet...
Shënim i autorit: Në qoftë se do të isha statisticien bastesh, do t’i vija koeficient të barabartë të tre skenarëve. Thënë ndryshe, probabiliteti për secilin skenar të mësipërm mund të jetë pak a shumë i njëjtë.
Ky artikull u shkrua ekskluzivisht për “Albanian Free Press” dhe afp.al. ndalohet rreptësisht ripublikimi nga çdo media tjetër. Në rast kundravajtjeje, do të publikohen shkelësit
Shënim: Qëndrimet e shprehura në shkrimet e rubrikës Opinion, nuk përfaqësojnë domosdoshmërisht një vijë editoriale të Albanian Free Press