Luanët sulmojnë makinën, momente tmerri për dy gra dhe dy fëmijë brenda automjetit (VIDEO)

Dy femra dhe dy fëmijë u përballën me një lukuni luanësh, që iu turrën automjetit të tyre pranë Parkut Safari të West Midlands në Britaninë e Madhe.

“23-vjeçarja Abi Tudge dhe mikesha e saj 28-vjeçare Jaz Reynolds, ndodheshin brenda automjetit tip Hunday kur konstatuan praninë e grabitqarëve ndër më të frikshmit e planetit”, raporton Daily Mail.

Në sedijen e pasme, ishin dy fëmijë që ato i kishin sjellë për t’u zbavitur.

Sulmi i luanëve zgjati për afro 50 minuta, ndërsa kafshët iu turrën makinës, duke e gërvishtur me putra.

“Nuk bërtisnim dot, edhe pse ishim të tmerruara, që të mos frikësonim edhe më shumë fëmijët që ndodheshin në sedijen e pasme”, ka treguar një prej femrave.

Brenda automjetit, katër pasagjerët jetuan minuta terrori, duke patur frikë se xhamat mund të thyheshin dhe të gjendeshin në dhëmbët e kafshëve të egërsuara.

Makina mbeti e bllokuar brenda parkut, pasi porta e daljes ishte bllokuar nga rojet e sigurisë.

Parku Safari i West Midlands konfirmoi se dalja e rrethimit ishte e mbyllur përkohësisht për shkak të afërsisë së kafshëve me portën, por theksoi se askush nuk kishte qenë në rrezik real.

Stafi i parkut erdhi dhe qetësoi luanët e egërsuar, pastaj hapi portat që automjeti i bllokuar të vazhdonte rrugëtimin. /a.a/ Albanian Free Press Online/

Foto dhe Video: Daily Mail