Kopshti Botanik përfundon në gjyq, reagojnë PD dhe LSI: Qeveria dhe Bashkia duan të "mbjellin" aty specien e Rilindjes!

Kopshti Botanik përfundon në gjyq, reagojnë PD dhe LSI: Qeveria dhe Bashkia duan të "mbjellin" aty specien e Rilindjes!
PD dhe LSI kanë reaguar sot mbi një projekt, që sipas tyre, kërkon të kthejë Kopshtin Botanik, në një kantier ndërtimi, për pallate. Opozita ka ftuar studentë e pedagogë të dalin e të mbrojnë pronën Publike, që sipas tyre po shkatërrohet nga pushteti për interesa private.

Rektori e ka paditur vendimin e qeverisë për kalimin e Kopshtit Botanik në pronësi të Bashkisë së Tiranës. Sakaq, sot po zhvillohet edhe procesi gjyqësor, mbi këtë çështje. Shkencat e Natyrës kërkojnë që Kopshti Botanik të mbetet pronë e Universitetit Publik dhe shtetit, por jo e bashkisë, pasi kjo e fundit nuk ka kapacitete intelektuale për menaxhimin e tij. Por seanca u shty, se palët e paditura nga Shkencat e Natyrës nuk shkuan në gjykatë.

Kryetarja e LSI, sot nga Kopshti Botanik, u bëri thirrje studentëve dhe pedagogëve të Shkencave të Natyrës, por edhe ish-studentëve të këtij fakulteti, që të ngrihen dhe të mbrojnë pronën publike. "Sot universiteti Publik ka nevojë për ne, ka nevojë për t'u bashkuar me ta, për mbrojtjen e Kopshtit Botanik", theksoi Kryemadhi. Ajo solli në vëmendjen edhe shkatërrimin e Muzeut të Kafshëve, dhe laboratorit shkencor, për t'i hapur vend ndërtimin e pallateve.

E njëjta gjë si me Muzeun e Kafshëve, - tha Kryemadhi, - po ndodh edhe me Kopshtin Botanik, nga "Rilindja e oligarkëve", theksoi ajo.

" Nuk duhet të lejojmë të betonizohet muzeu i shkencave. Është e domosdoshme angazhimi i të gjithëve ne. Ne te Shkencat e natyrës kemi studiuar bimë dhe specie të ndryshme. Mirëpo, një specie nuk kemi studiuar, atë të Rilindjes. Nuk po pushton çdo ditë edhe më shumë jo vetëm ditën e shqiptarëve. Idiokracia e Rilindjes që do ta kthej çdo insitucion të arsimit në lavatriçe të parave. Sot më shumë se kurrë ne duhet të japin mbështetjen tonë se vetëm kështu mund të shpëtojmë të ardhmen tonë", tha Kryemadhi.

Pak më herët mbi këtë çështje reagoi ish-deputeti demokrat, Luciano Boci.

“Rama dhe Veliaj po grabisin 15 hektarë të Kopshtit Botanik me VKM special, për të ndërtuar kulla betoni, pa konsultimin me Rektoratin, Senatin, dekanatin, asamblenë e personelit akademik e as këshillin studentor, si pronarët ligjorë të Kopshtit Botanik”.

Ish-deputeti i Partisë Demokratike Luçiano Boçi ngriti akuza të forta ndaj kryeministrit Edi Rama dhe kryebashkiakut të Tiranës Erion Veliaj, teksa bëri denoncimin sot, për atë që ai e quajti grabitje të zonës që njihet si Kopshti Botanik.

Ish-deputeti i bëri “thirrje pedagogëve, studentëve dhe qytetarëve të solidarizohen sot në ora 11.00 pranë Liceut Artistik, me betejën ligjore që po bëhet nga Universiteti kundër rrëmbimit, grabitjes dhe hajdutërisë së kësaj prone publike”.

Deklaratë e Luçiano Boçit:

Edi Rama dhe Erion Veliaj po rrëmbejnë me dhunë shtetërore Kopshtin Botanik, pronë e Universitetit të Tiranës, për ta shndërruar këtë nga një zonë të gjelbër dhe të rëndësishme për interesa akademike, në një shesh për kullat e betonit.

Një vendim i qeverisë së Edi Ramës grabit 15 hektarë të Kopshtit Botanik me synimin për të pastruar aty në fushën e ndërtimit me miliona euro para të pista.

Ky vendim është vjedhja më e madhe që i bëhet sot Universitetit dhe është në kundërshtim të plotë me ligjin e Arsimit të Lartë dhe statutin e Universitetit te Tiranës, të cilët nuk lejojnë trasferimin e pronësisë dhe ndryshimin e destinacionit të saj.

Kjo vjedhje me VKM speciale, eliminon krejtësisht punën kërkimore shkencore në Fakultetin e Shkencave të Natyrës dhe i jep një goditje fatale procesit akademik.

Në vend që të rrisë financimin për Arsimin e Lartë dhe kërkimin shkencor, Edi Rama, përkundrazi, i heq të drejtën e pronësisë.

Në vend që t’i ndihmojë për të ndërtuar laboratorë shkencorë për procesin mësimor, Rama i eliminon laboratorin më të madh natyror për të ndërtuar dhe për të pastruar paratë e korrupsionit dhe krimit të organizuar.

Në vend t’i japë frymëmarrje Universitetit, Rama godet autonominë dhe lirinë akademike të tij me harbutëri dhe padrejtësi.

Vendimi është marrë nga Rama - Veliaj në mënyrë arbitrare dhe arrogante, pa pyetur as Rektoratin e universitetit, as Senatin, as dekanatin, as asamblenë e personelit akademik e as këshillin studentor që janë ligjërisht pronarët e vërtetë dhe ligjorë të Kopshtit Botanik.

Asnjë konsultim paraprak nuk është bërë me ta, siç pretendohet në deklaratat e Bashkisë Tiranë.

Asnjë dakordësi nuk është dhënë  për këtë grabitje.

Madje pedagogët e studentët e kanë kundërshtuar me forcë rrëmbimin e kësaj prone, duke përballur çdo presion apo joshje që u është bërë.

Ata kanë kërkuar pranë gjykatës administrative anulimin e kësaj VKM-je korruptive dhe kriminale në një seancë që zhvillohet sot në orën 11.00.

Partia Demokratike ka mbështetur dhe mbështet të drejtën legjitime të përfaqësuesve të Universitetit dhe të asamblesë së personelit akademik dhe i bashkohet përpjekjeve të tyre për anullimin e VKM-së grabitëse 510.

Ne u bëjmë thirrje pedagogeve, studenteve dhe qytetarëve të solidarizohen sot në ora 11.00 pranë Liceut Artistik, me betejën ligjore që po behet nga Universiteti kundër rrëmbimit, grabitjes dhe hajdutërisë së kësaj prone publike./ Afp.al

loading...
loading...