Presidenti Meta nis vizitë zyrtare në Estoni, në fokus disa marrëveshje bilaterale

Presidenti i Republikës së Shqipërisë, Ilir Meta nisi një vizitë zyrtare dyditore në Estoni, me ftesë të Presidentes të Republikës së Estonisë, Kersti Kaljulaid.

Gjatë kësaj vizite, Presidenti Meta pritet të takohet edhe me Kryetarin e Parlamentit të Estonisë, Henn Polluaas, dhe Kryeministrin Juri Ratas.

Në këto takime do të diskutohet për sfidat e përbashkëta të sigurisë europiane, proceset e integrimit euro-atlantik dhe intensifikimin e bashkëpunimit dypalësh në të gjitha fushat me interes reciprok.

Në prani të dy Presidentëve, do të nënshkruhet edhe Memorandumi i Mirëkuptimit në fushën e Integrimit Europian ndërmjet Ministrive të Punëve të Jashtme të të dy vendeve.

Gjatë qëndrimit në Estoni, Presidenti do të japë një ligjëratë në shkollën estoneze të Diplomacisë, si dhe do të vizitojë Qendrën e Ekselencës për Mbrojtjen Kibernetike të NATO-s dhe Qendrën e Brifingjeve E-Estonia.