E bukura e këtij qyteti që frymëzoi Kadarenë, as fshihet dhe as shuhet! Foto

E bukura e këtij qyteti që frymëzoi Kadarenë, as fshihet dhe as shuhet! Foto
Gjirokastra, qyteti i ngurtë, i përfshirë në Listën e Trashëgimisë Botërore të UNESCO-s më 2005, si një nga pak shembujt e mbijetuar në Ballkan të qyteteve tregtare të stilit otoman, ofron bukuri të rralla për vizitorët e saj të shumtë, duke i magjepsur ata, sidoemos të huajt.

Qyteti që frymëzoi shkrimtarin e madh Ismail Kadare besohet se emrin e mori nga Pincesha Argjiro. Flijimi i princeshës me foshnjën e saj, për të mos rënë e gjallë në dorë të turqve, simbolizon qëndresën dhe heroizmin e rrallë të popullit tonë.

“Visit South Albania” publikoi disa foto magjepsëse të rrugicave dhe lagjeve piktoreske të Gjirokastrës, aty ku bukuritë e rralla të këtij qyteti qëndrojnë të pacenuara ndër shekuj, karshi Kështjellës. Pamja magjepse e këtij qyteti as vyshket, as fshihet dhe as shuhet!

 

“Albanian Free Press” me rastin e 83-vjetorin të lindjes së shkrimtarit me përmasa botërore, Ismail Kadare, (28 janar 1936), publikon poemën që iu kushtua prej tij Princeshës Argjiro, si simbol i qytetit jugor të Shqipërisë:  

Ra si Yll, po s’u shua

Vështroi princesha krenare

në çdo kullë e në çdo kamare

si të fundit roje ranë

çdo pëllëmbë me gjak e lanë.

 

Dhe e vetme ajo mbeti

përmbi kullë porsi deti

që i hedh dallgët në rërë

turqit u vërsulen të tërë.

Që ta zënë yllin të gjallë

po a zihet ylli vallë?

 

Ja argjiroja e shpejtë

tok me foshnjëzën e vet

u vërtit si zog në erë

nga kalaja në humnerë.

Shkëmb më shkëmb seç u copëtua

ra si ylli po s'u shua

 

dhe kujtoi ky shkëmb i bardhë

se fëmija i saj mbet gjallë

dhe që foshnjën ta mëkojë

qumësht zuri të pikojë.

Ismail Kadare

Përgatiti: A.M