I dënuar më parë, kapet me armë në Ballsh, del që edhe makinën e kishte të vjedhur

Policia arreston një të dënuar më parë për vjedhje, me armë në brez. Ai u ndalua në fshatin Dukas të Ballshit, por dyshohet se ai kishte vjedhur edhe makinën, pasi ajo rezultonte me targa të falsifikuara dhe numër shasie të modifikuar.

Personi që u vu në pranga është shtetasi me iniciale, A.I, 33-vjeç nga Mallakastra.

Njoftimi i policisë:

Qarkullonte me armë zjarri në brez, arrestohet në flagrancë 33-vjeçari.

Në vijim të punës për parandalimin dhe goditjen e paligjshmërisë, në zbatim të planit të masave për kapjen e personave që qarkullojnë me armë zjarri, si dhe nga informacionet e marra në rrugë operative, nga specialistët për Hetimin e Krimeve në Komisariatin e Policisë Mallakastër është arrestuar në flagrancë shtetasi:

-A.I., 33 vjeç, banues në Mallakastër

(i dënuar më parë për "Vjedhje")

Ky shtetas është kapur nga shërbimet e Komisariatit të Policisë Mallakastër në hyrje të qytetit të Ballshit, në Dukas, duke udhëtuar me një mjet tip "Benz" dhe  gjatë kontrollit fizik iu gjet dhe iu sekuestrua një pistoletë me një krehër dhe tetë fishekë.

Gjithashtu nga verifikimi që i është bërë automjetit tip "Benz", dyshohet se ky automjet mund të jetë i vjedhur dhe trafikuar pasi rezulton me targa të falsifikuara dhe me numër shasie të modifikuar.

Materialet i kaluan Prokurorisë pranë Gjykatës së Shkallës së parë Fier për veprat penale "Armëmbajtje pa leje",  "Trafikimi i mjeteve motorrike" dhe "Falsifikimi i vulave, stampave ose formularëve". /Afp.al/