Kosovë/ KQZ jep të dhëna për numrin e votuesve, 4 orë para mbylljes së kutive. Shënohen edhe disa parregullsi

Sipas shifrave zyrtare, kur mbeteshin edhe katër orë nga mbyllja e votimeve në Kosovë, deri në ora 15:00, kanë votuar 29.44 për qind e qytetarëve, shifër kjo që konsiderohet e kënaqshme.

Të dhënat janë publikuar në Komisioni Qendror Zgjedhor.

Sa i përket daljes në votime kryesojnë komunat me shumicë serbe.

Dalja më e madhe e votuesve deri në këto orë është në Shtërpcë, me 40.10%.

Por ka pasur edhe disa parregullsi, që gjithsesi KQZ tha se nuk e cënojnë procesin.

Katër persona janë ndaluar në stacionin policor në Prizren, pasi dyshohet se kanë fotografuar votën. Lajmin e ka konfirmuar zëdhënësi i policisë në Prizren, Vesel Gashi.

“Mund të ju konfirmojë se Policia e Kosovës, në bashkëpunim me prokurorinë kemi ndaluar katër persona të cilët dyshohet se kanë keqpërdorur votën”, tha Gashi.

Personat e arrestuar votuan në shkollën “Abdyl Frashëri”, dhe një në “Mustafa Bakia” të Prizrenit.

Kosova me të drejtë vote zgjedh sot përfaqësuesit e tyre për Kuvendin e ri, prej nga ku do të dalë edhe qeveria e re e këtij shteti.

Në këto zgjedhje, të drejtë vote kanë më shumë se 1 milion e 900 mijë qytetarë.

Zgjedhjet e parakohshme mbahen në Kosovë, pas vendimit të kryeministrit Ramush Haradinaj pak muaj më parë, kur edhe dha dorëheqjen.

Procesi i zgjedhjeve në Kosovë po ndiqet edhe nga monitoruesit ndërkombëtarë, të cilët pavarësisht disa parregullsive, deri tani nuk kanë ngritur shqetësime./Afp.al/