Sondazhi/ Mbi gjysma e studentëve të pakënaqur me institucionet e Arsimit të Lartë

Në mesin e këtij muaji pritet të fillojë viti i ri Akademik.

Në auditore do të ulen me dhjetëra mijëra studentë, por si i gjet ky sezon i ri akademik studentët, gati një vit pas protestave të tyre masive?

Pas 5 muajsh janë publikuar disa nga të dhënat e Sondazhit Kombëtar të Studentëve.

Gjetjet tregojnë se më shumë se gjysma e studentëve janë të pakënaqur me mbështetjen e ofruar nga institucionet e Arsimit të Lartë.

Rreth 52% e studentëve janë të pakënaqur me institucionet, bazuar në prezantimin e gjetjeve të Sondazhit Kombëtar të Studentëve.

Ministrja e Arsimit Besa Shahini tha se të dhënat duhet të angazhojnë drejtuesit e universiteteve për rritjen e cilësisë së mësimdhënies dhe përmirësimin e infrastrukturës.

"Mendoj që ky është një porosi e rëndësishme për të menduar për të. Pra çfarë mund të bëjmë ne për të mirësuar gjendjen në universitetet publike. Si gjendjen infrastrukturore, por si edhe në cilësinë e arsimit që realisht i takon universiteteve që ta përmirësojnë urgjentisht", u shpreh Shahini.

Sondazhi u zhvillua gjatë muajve prill-maj të këtij viti. Janë rreth 89 mijë pyetësorë të dërguar studentëve,  mesatarja e plotësimit të të cilëve në nivel kombëtar thuhet se ishte 31.2%. /Afp.al/