Rreth 60 parashutistë nga vende të ndryshme të Ballkanit do të jenë këtë javë në Gjirokastër për eventin Gjiro Open Air, i cili nuk është vetëm një aktivitet sportiv. Ky aktivitet nis sot e do të vazhdojë deri më datë 26 mars.
Për tre ditë pilotët do të organizojnë fluturime duke u nisur nga mali i Çajupit përballë Gjirokastrës, ndërsa janë parashikuar edhe guida për t’u njohur me disa nga vendet historike të zonës, si Parkun Arkeologjik Antigone, Kisha e Saraqinishtit, Manastiri i Spilles, Teatri i Adrianopulit.
Në një status në rrjetet sociale, Ministrja e Kulturës, Mirela Kumbaro shkruan se kjo do të jetë një javë plot adrenalinë për Gjirokastrën. “Kjo javë mban shenjën #GjiroOpenAir. Sport në ajër! Kulturë në tokë! Mos e humbni! Vendi ku fluturohet me sport e kulture quhet Gjirokastër”, shkruan Kumbaro.
Gjiro Open Air do të kulmojë me “Gjirokastra by Night”, më datë 25 mars, një “street party” që do të mbahet në Qafën e Pazarit, me pjesëmarrjen e Dj. Cool.