Trajneri Artan Mërgjyshi është larguar një ditë pas fitores së skuadrës ballshiote me Pogradecin në “Adush Muça”. Drejtuesit e klubit mallakastriot dhe trajneri 48-vjeçar ndërprenë me konsensus marrëveshjen, por në një moment delikat, pasi në javët e mbetura të Kategorisë së Parë Bylis synon ngjitjen në Kategorinë Superiore.
Mërgjyshi nuk ishte në stol as në suksesin minimal me pogradecarët për arsye pezullimi, por ndarja mes palëve u bë zyrtare vetëm gjatë të martës.
Vendin e lënë bosh nga Mërgjyshi pritet ta marrë një trajner i huaj, i njohur për futbollin shqiptar, braziliani Marcelo Troisi, i cili më parë ka drejtuar Kukësin dhe Laçin në Kategorinë Superiore.
Bylisi po rivalizon me Lushnjën për një vend në Superiore dhe gjithçka pritet të zgjidhet në ndeshjen e fundit direkte, që do të luhet në “Roza Haxhiu”. Në përballjen e kaluar, në “Adush Muça”, zhvilluar më 8 prill, vendasit nuk arritën të fitonin përballë rivalit direkt. Ndoshta është kjo një nga arsyet kryesore që drejtuesit nuk kanë qenë të kënaqur me punën e Artan Mërgjyshit, ndaj edhe vendosën për largimin e tij nga stoli ballshiot.
/a.m/
