Ndërkaq, sa u përket monedhave metalike, Banka e Shqipërisë referon se në fund të vitit të kaluar rezultuan 170.494.419 copë të tilla në qarkullim, me një vlerë totale prej 4.098 miliardë lekë. “Në krahasim me vitin 2015, rezulton një rritje e numrit të monedhave metalike me 7.6% dhe një rritje e vlerës së tyre me 7.9%”, sqarojnë ekspertët e Bankës së Shqipërisë. Duke shtuar sakaq se në fund të vitit 2016, raporti i përgjithshëm midis vlerës së monedhës metalike ndaj kartëmonedhës rezultoi pothuajse i njëjtë me vitin e kaluar.
25.9 milionë kartëmonedha të grisura, ekspertët i hoqën direkt nga qarkullimi
Ato rezultonin të grisura dhe aspak të përshtatshme për të kryer pagesa, e si të tilla, ekspertët i tërhoqën direkt nga qarkullimi, një pjesë të mirë duke e ripërpunuar. Fjala është për plot 25.9 milionë copë kartëmonedha të konsideruara si të papërshtatshme për përdorim nga një kontroll i ushtruar prej bankës qendrore. “Gjatë vitit 2016, u përpunuan rreth 114 milionë copë kartëmonedha, të cilat u kontrolluan për autenticitet dhe përshtatshmëri për riqarkullim. Nga përpunimi rezultuan rreth 25.9 milionë copë kartëmonedha të papërshtatshme për përdorim, të cilat u tërhoqën nga qarkullimi. Norma e sortimit ishte 22.6%, ndërkohë që i njëjti tregues për vitin 2015 ishte 25%”, argumentojnë ekspertët lidhur me këtë dukuri. Duke shtuar më tej faktin se kartëmonedhat e papërshtatshme për qarkullim janë zëvendësuar rast pas rasti me kartëmonedha të reja, të përshtatshme për qarkullim. E lidhur me këtë të fundit, ata pohojnë se koefiçienti i qarkullimit të kartëmonedhës për vitin 2016 rezultoi në vlerën 0.95, që do të thotë se një kartëmonedhë kthehet mesatarisht rreth një herë në vit në sportelet e Bankës së Shqipërisë. “Ky koefiçient është më i lartë për prerjet 500 lekë, 1000 lekë (rreth 1.7 dhe rreth 1.2) dhe më i vogël për prerjet 5000 dhe 2000 (rreth 0.22 dhe 0.78), gjë që tregon se këto të fundit kthehen më rrallë në sportelet e Bankës së Shqipërisë”, sqaron gjithashtu BSH-ja.
Gjysma e falsifikimeve, me kartëmonedhën 1000 lekëshe
Kujdes kur keni në dorë një kartëmonedhë 1000 lekëshe. Sepse një në dy, është probabiliteti që ajo mund të jetë e falsifikuar. Dhe kjo, pasi sipas Bankës së Shqipërisë, pikërisht falsifikimet e kësaj kartëmonedhe zunë gjatë vitit të kaluar 47% të totalit të tyre. Edhe pse në tërësi, sipas këtij institucioni, është fakt se vjet, sasia e kartëmonedhave dhe monedhave metalike të falsifikuara, të zbuluara në qarkullim, ka pësuar ulje me -13.4%, krahasuar me një vit më parë. “Kartëmonedha 1000 lekëshe është e ndjekur më pas nga monedha metalike 50 lekë me 19% të totalit, si dhe prerjet 500 lekë dhe 2000 lekë me respektivisht 15% dhe 14 % të totalit të falsifikimeve”, sqarohet më tej nga ekspertët e Bankës së Shqipërisë. Duke shtuar gjithashtu se nga monitorimi i fenomenit të falsifikimit për kartëmonedhat kombëtare të evidentuara si të falsifikuara, vijojnë të dominojnë riprodhimet digjitale me ngjyra, të kombinuara me aplikimin e metodave aditive për imitimin e elementeve të sigurisë. Ndërkohë, sa i përket teknikës bazë të falsifikimit të kartëmonedhave nuk konstatohet tendencë drejt printimeve me natyrë profesionale, duke u fokusuar në përmirësimin e aftësisë për imitimin e elementeve të sigurisë së nivelit të parë, me natyrë vizuale dhe të prekjes, dhe më rrallë tek ato të lexueshëm nga pajisjet autentifikuese.
