***
Antena interviston Endri Fugën
Endri Fuga: Fate Velaj më ka thënë që Erdogani e ka gjyshen nga Prishtina
Tahir Avazi: - Z.Fuga, si shkoi vizita e z. Rama në Turqi? A jeni i kënaqur prej saj?
Endri Fuga: - Këtë herë më shumë se herët e tjera madje. Unë personalisht jam i kënaqur. Dhe kur jam unë, është edhe Kryeministri.
- Morëm vesh që u diskutua edhe për çështjen e naftës...
- Për të pak u diskutua, në fakt. Fjala e z. Rama u prit me duartrokitje, megjithëse foli shkurt.
- Duartrokitën të pranishmit?
- Sigurisht që po. Sa dëgjuan që punëtorët e rafinerisë në Ballsh paguhen me copa, pati ovacione nga sheikët. Gjithsesi, megjithëse u diskutua pak, pati një ndikim dhe reagim të madh.
- Ku konsistoi ky ndikim dhe reagim? A mund ta dimë?
- Vetë Presidenti i Turqisë sa mori vesh që çmimi i naftës këtu është 1.5$ dhe në Turqi është veçse 1.2$, thirri në divanin e tij ministrin e Naftës.
- E thirri në divan?!
- Po, po, në divan. E uli pranë z. Rama dhe ai rrinte si pulë.
- Përse?
- Si është e mundur, - i tha ministri i Naftës zotit Rama, që juve ia dilni të zhvilloni ekonominë me atë çmim nafte?
- Po z. Rama si iu përgjigj?
- E thjeshtë fare. Nuk e zhvillojmë, - iu përgjigj Kryeministri ynë, - Kishim Arben Ahmetajn ministër që u hedh sërën njerëzve.
- Po si i fitoni zgjedhjet pa zhvilluar ekonominë?, tha ai.
I iku mendja kur mori xhevapin e z. Rama.
- Pse, ç'i tha z. Rama?
- Të vërtetën i tha.
- Çfarë i tha, a mund ta dimë?
- 70 për qind e njerëzve nuk votojnë, - i tha, - se shumë prej tyre janë emigrantë dhe pjesa tjetër nuk shkojnë në qendrat e votimit fare. Në atë çast ndërhyri z. Erdogan.
- Çfarë tha ai?
- Erdogani u çua në këmbë dhe mori në telefon Këshilltarin e tij për Zgjedhjet. "Të sigurohet që kurdët të cilët nuk më votojnë mua, të shkojnë në Evropë”, - i tha.
- Kemi mësuar që z. Rama foli me z. Erdogan edhe për një aeroport që do bëhet në Vlorë.
- Këtë nuk e di. Pse prapë foli Rama për këtë gjë?! E çuditshme! Ne për këtë gjë folëm edhe në muajin shkurt të këtij viti kur takuam Erdoganin.
- Keni folur edhe në shkurt për këtë gjë?
- Eee, këtë punë kemi ne. Sa herë e takojmë, për atë aeroport llafosim. Dhe asgjë s'po bën Tahipi.
- Ndoshta është i kujdesshëm në investime...
- I kujdesshëm është posi. Mbaj mend që në muajin shkurt kur diskutuam rreth këtij aeroporti, na pyeti: Ku doni ta ndërtojmë?
- Po ju a e kishit përcaktuar vendin gjatë bisedimeve?
- Në "Pyllin e Sodës", - i tha z. Rama. Sa dëgjoi këtë, Tahipit i ranë mustaqet mbi çajin që po pinte. U çudit. I iku tepeleku, siç i thonë turqit.
- Përse u çudit?
- Jalla, jalla tha. Kam dëgjuar që ka pyll pishe, pyll ahu, pyll gështenjash, etj. Po që të ketë "pyll sode", vetëm tani po e marr vesh.
- A e sqaruat se bëhej llaf për...
- Ku priste ai të sqarohej. Filloi të vinte rrotull divanit, njëlloj si Fate Velaj kur vjen rrotull pikturave të tij. Leqë sa filloi të sqaronte z. Rama, e morën në telefon.
- Kush e mori?
- Fate Velaj e mori. “Ka rënë zjarr në Tepelenë. Po digjet depoja e ujit”, - i tha.
- Ç'punë ka Fatja me ...?
- Fatja është vendosur të raportojë për çdo gjë që ndodh. Nuk ka vetëm për detyrë që të pikturojë. Nuk e ka punësuar kot z. Rama.
- Si reagoi z.Rama kur mori vesh që po digjej depoja e ujit?
- Si të reagonte! I bërtiti: O Fate, o trap, po si mund të digjet depoja e ujit!?, - i ulëriti.
- Vërtet, si mund të digjet depoja e ujit?!
- Kështu e kishte lexuar në titrat e televizioneve informative Fatja. S'kemi ç'bëjmë o Tahir Avazi. Këto janë "mediat e kazanit" për të cilat flet përherë Kryeministri. "Depon e Ujit" e ngatërrojnë me "Depon e Karburantit". Kujtojnë se uji merr flakë.
- Me aeroportin ç'do bëhet. Kur do ndërtohet?
- Së shpejti do jetë gati projekti. “Hajde edhe dy herë më tako, - i tha Erdogani zotit Rama, - se ne arnautët kështu i bëjmë gjerat. Avash, avash”.
- Po thoni që Erdogani është arnaut?
- Që është arnaut, është e sigurt. E para, sepse vetëm një arnaut i zvarrit gjërat. Kemi shkuar pesë herë dhe akoma s'ka nisur aeroporti. Kam të dhëna që gjyshen e ka pasur nga Prishtina. E dyta, vetë emri Tahip. Emër tipik shqiptar.
- Keni ndonjë fakt për këtë që po deklaroni?
- Së shpejti do bëhen publike edhe faktet. Po punon Fate Velaj për këtë.
- Si përherë ai, domethënë?
- Se mos ka punë tjetër Fatja.
Rubrika e përditshme satirike e “Albanian Free Press”, “Antena Jashtë Familjes”, përgatitet nga Helidon Tahiraj