Ky artikull është shkruar posaçërisht për gazetën “Albanian Free Press”
Në garën e 25 qershorit, PD-ja i përfshiu kryetarët e partive aleate në listat e saj të deputetëve. Si rezultat, aleatët u bënë thirrje përkrahësve të tyre të votonin për PD-në, si sigla e vetme që do të përfaqësonte opozitën. Në ato kushte, ishte më se e natyrshme që PD-ja të synonte të merrte të paktën aq vota sa kishin marrë para katër vjetësh, së bashku, të gjitha partitë opozitare.
Në 2013-ën, koalicioni i PD-së kishte marrë 680 mijë vota, por prej tij u largua PDIU-ja, ndërkohë që u afrua PBDNJ-ja. Me pak fjalë, 25 partitë opozitare që u përfaqësuan me siglën e PD-së në 25 qershor, kishin marrë 660 mijë vota para katër vjetësh (Në fakt, po kaq vota kishin marrë edhe kandidatët opozitarë për kryebashkiakë para dy vjetësh).
Por në 25 qershor, PD-ja mori 200 e ca mijë vota më pak se sa 660-mijëshi i mëparshëm. Thënë ndryshe, ajo mori vetëm 69% të 660-mijëshit, i cili duhej të ishte objektivi minimal i saj (shihni Tabelën 1).
Nga Tabela 1 (ku qarqet janë renditur sipas performancës së PD-së), duket qartë se në qarkun Fier (ku kryesonte listën Enkelejd Alibeaj), PD-ja pati në 25 qershor një rendiment votash (81%) ndjeshëm më të mirë se sa në qarqet e tjera. Ndërsa në qarkun e Elbasanit, PD-ja pati rezultatin më të dobët; mori vetëm 59% të votave që morën para katër vjetësh ajo dhe aleatët.
Tabela 1
QARKU | PD 2017 | PD + 24 parti aleate, 2013 | Krahasimi: '17 vs. '13 |
TOTAL | 456,000 | 660,000 | 69% |
Fier | 46,799 | 57,956 | 81% |
Korcë | 42,177 | 58,104 | 73% |
Shkodër | 40,763 | 55,614 | 73% |
Kukës | 19,935 | 27,512 | 72% |
Berat | 16,302 | 22,596 | 72% |
Tiranë | 128,065 | 180,371 | 71% |
Lezhë | 27,550 | 40,041 | 69% |
Gjirokastër | 13,321 | 20,004 | 67% |
Durrës | 43,163 | 67,485 | 64% |
Vlorë | 23,207 | 38,135 | 61% |
Dibër | 21,331 | 35,249 | 61% |
Elbasan | 33,868 | 57,571 | 59% |
Le të kalojmë tani tek PS-ja. Nga ish-koalicioni i saj i “1 milion shuplakave”, u largua LSI-ja dhe PBDNJ-ja. Ndryshe nga PD-ja, PS-ja nuk përfshiu kryetarë partish të vogla në listat e saj, por ata si dhe drejtues lokalë të partive të vogla (si dhe kandidatët të pavarur të majtë, si Dritan Prifti, për shembull) bënë thirrje që përkrahësit e tyre të votonin për PS-në. Edhe Edi Rama u bëri vazhdimisht thirrje votuesve të majtë (të PS-së dhe të partive të vogla të majta), që t’i jepnin mjaftueshëm vota PS-së, për të siguruar të paktën 71 mandate.
Në këto kushte, një objektiv i natyrshëm për PS-në ishte marrja e të paktën 810 mijë votave (aq sa kishin marrë partitë/kandidatët e majtë, minus LSI-në e minus PBDNJ-në). Por në 25 qershor, PS-ja (plus deputeti Tom Doshi, i cili kishte deklaruar para zgjedhjeve se do të votonte për Edi Ramën) mori 30 mijë vota më pak se sa 810-mijëshi. Thënë ndryshe, ajo realizoi 96% të këtij objektivi (shihni Tabelën 2).
Nga Tabela 2 (ku qarqet janë renditur sipas performancës së PS-së), duket qartë se në qarqet Kukës (ku garoi fuqishëm Safet Gjici) dhe Durrës (ku punoi fuqishëm Vangjush Dako), PS-ja pati në 25 qershor një rendiment votash ndjeshëm më të mirë se sa në qarqet e tjera (përkatësisht 143% dhe 108%). Ndërsa në qarkun e Elbasanit, PS-ja pati rezultatin më të dobët; mori vetëm 88% të votave që morën para katër vjetësh ajo dhe aleatët.
Tabela 2
QARKU | PS 2017 | PS + 36 parti aleate, 2013 | Krahasimi: '17 vs. '13 |
TOTAL | 780,000 | 810,000 | 96% |
Kukës | 18,387 | 12,817 | 143% |
Durrës | 73,066 | 67,616 | 108% |
Shkodër* | 52,473 | 51,006 | 103% |
Vlorë | 65,684 | 64,507 | 102% |
Lezhë | 30,406 | 29,957 | 101% |
Gjirokastër | 27,222 | 27,278 | 100% |
Berat | 45,637 | 45,897 | 99% |
Dibër | 24,795 | 26,746 | 93% |
Tiranë | 200,517 | 216,407 | 93% |
Fier | 104,162 | 113,219 | 92% |
Korçë | 62,787 | 70,804 | 89% |
Elbasan | 72,881 | 83,150 | 88% |
*Në qarkun Shkodër janë përfshirë edhe votat e deputetit Tom Doshi
Ndalohet rreptësisht ripublikimi i këtij shkrimi pa një leje të shkruar nga redaksia e Albanian Free Press
Shënim: Qëndrimet e shprehura në shkrimet e rubrikës Opinion, nuk përfaqësojnë domosdoshmërisht një vijë editoriale të Albanian Free Press