Që në fillimet e kohërave, ngjyra e kuqe ishte personifikim i shkëndijës që niste jetën dhe, në tërë antikitetin, ngjyra e kuqe kishte lidhje me perënditë dhe priftërinjtë. Kështu, në Greqinë e Lashtë ishte e kuqe mbulesa që vendosej në karrigen mbretërore. Të kuqe e përshkruanin edhe veshjen e Afërditës, perëndisë së dashurisë. Imagjinoni pak që, 2800 vjet përpara Krishtit, në epokën e sumerëve, u gjet në varrin e princeshës Shub-ab, një përzierje e kuqe për të lyer buzët. Pra, e kuqja personifikoi më pas, edhe buzëkuqin që ndryshoi historinë e bukurisë. Më 1955, lindi “i kuqi Dior” dhe Christian Dior do të shprehej: “Është ngjyrë stimuluese dhe tërheqëse. Është forca e jetës. E dashuroj të kuqen dhe, për mendimin tim, shkon mirë me çdo ngjyrë lëkure!” Më pas, shumë më pas, erdhi dhe “i kuqi Valentino”, në veshjet e stilistit të madh italian. Kjo linjë u ngrit në kult dhe ka ardhur deri sot. Me një rikthim në pasarelat e modës, në sfilatat e vitit 2012, për disa kohë, u la në hije nga ngjyra e purpurt dhe lejla, në të gjitha versionet, por nuk shkoi gjatë. Këtë vit, ngjyrën e guximshme dhe sensuale, do ta shikojmë gjatë gjithë dimrit. Edhe personazhet tona të showbiz-it, u treguan të shkathëta ta risjellin këtë ngjyrë, me mbërritjen e vjeshtës, - që nga fustanet elegante dhe seksi të Aurela Hoxhës dhe Xhesika Ndojës, te kadifeja mbretërore e Alketa Vejsiut, që na mahnit nga Parisi i dashurisë ndërkohë që Morena Taraku na e sjell në versionin luksoz të peliçes. E shohim në fotot e postuara prej tyre, në versionin “elegant fetish”, të plastifikuar nga Greta Koçi dhe Artea Beberi, por edhe si xhaketë-aksesor nga Vilma Masha dhe aktorja, Laura Nezha. Modelja ndërkombëtare, Anxhela Martini, e risjell në versionin me pika të bardha, lozonjar dhe të lehtë si ajri, ndërkohë që Orinda Huta e kombinon me rozën, në një version sport-shik. Në të gjitha këto kombinime të javës që lamë pas, ngjyra e kuqe është kryefjala. Duket qartë se do të jetë kryefjala edhe në festivalet muzikore dhe aktivitetet që dimri i Tiranës, do të ketë.