“U kujtojmë qytetarëve se, materialet piroteknike (fishekzjarrët), në rast se nuk përdoren në kohën dhe vendin e duhur, përbëjnë rrezik serioz për shëndetin. Njëkohësisht u kërkojmë objekteve të licencuara për tregtimin e tyre, si dhe organeve tatimore që mbikëqyrin procesin, të tregohen të kujdesshëm në zbatimin e ligjit për tregtimin e materialeve piroteknike”, - theksojnë ekspertët e ISHP-së. Sipas tyre, nga eksperienca e viteve të kaluara, apelohet për kujdes në tregtimin dhe përdorimin e fishekzjarrëve, veçanërisht në ditët e festave të fundvitit. Gjatë fundvitit të kaluar, nga spitalet universitare në Tiranë, u raportua për disa raste të djegieve të gradave të ndryshme, dëmtimeve dëgjim, në shikim, etj., si pasojë e shpërthimeve të pakontrolluara të fishekzjarrëve.
Këshilla të rëndësishme
- Mbani larg fëmijët, ruani veten dhe të tjerët!
- Mos përdorni fishekzjarrë në mjedise të mbyllura (shtëpi, lokale, bare, zyra apo klasa shkolle)!
- Asnjëherë mos ndizni fishekzjarrët brenda sendeve të forta e të mbyllura si gota, shishe qelqi e kuti metalike!
- Udhëzoni fëmijët të mos përdorin fishekzjarrët si lojë, pasi mund të dëmtohen rëndë!
- Mos lejoni fëmijët të luajnë me fishekzjarrë apo t’i ndezin, pa praninë tuaj!
- Asnjëherë mos mbani fishekzjarrë në xhepa!
- Asnjëherë mos i vendosni ato në pjesë të trupit kur i ndizni, por mbajini në distancë të largët dhe të sigurt!