Aranit Muraçi
Humbja e fundit në “Loro Boriçi” 2-0 e Vllaznisë ndaj Luftëtarit, ndeshje e vlefshme për javën e 30-të në Superiore, shton rrezikun e rënies nga kategoria të një prej ekipeve historike në futbollin shqiptar.
Kamza fitoi 2-1 ndaj Lushnjës, fitore që e largoi 4 pikë nga Vllaznia, ndërsa Teuta, para se të përballej mbrëmjen e djeshme me Flamurtarin në Vlorë, kishte po aq pikë sa të besuarit e trajnerit Ernest Gjoka.
Rënia e mundshme e Vllaznisë, shton rrezikon e rënies edhe të Vllaznisë B, pavarësisht se skuadra e drejtuar nga Ervis Kraja, arriti një fitore të rëndësishme 3-1 gjatë fundjavës ndaj Korabit. Kjo fitore ndaj një rivali direkt për qëndrimin në Kategorinë e Parë, siguron mbijetesën e Vllaznisë B, por sezonin tjetër, qëndrimi në këtë kategori do të jetë në varësi edhe të qëndrimit të Vllaznisë A, në Superiore.
Trajneri i Vllaznisë B, Ervis Kraja, për “Albanian Free Press” tregon rastin e paprecedentë që mund të ndodhë në futbollin shqiptar, ndërsa shprehet optimist se, të dyja ekipet do t’i arrijnë objektivat dhe nuk do të rrezikojnë rënien.
“Arritëm një fitore bindëse, kundër një kundërshtari që s’e meriton këtë kategori. Prandaj, shpresoj të luajë në kategorinë e dytë vitin tjetër”, - thotë Kraja. Por ekipi që ai drejton, Vllaznia B, edhe pse mori një fitore premtuese ndaj Korabit në betejën për mbijetesë, mund të penalizohet nëse Vllaznia A nuk arrin të qëndrojë në elitën e futbollit shqiptar.
Sipas rregullores, dy ekipe të të njëjtit klub, nuk mund të luajnë në të njëjtën kategori, çka do të thotë se rënia e Vllaznisë A në Kategorinë e Parë, zbret automatikisht në kategorinë e dytë Vllazninë B, ekipin e drejtuar nga Ervis Kraja.
Skuadra e drejtuar nga Ernest Gjoka pas humbjes me Luftëtarin këtë fundjavë, duhet të sigurojë mbijetesën për të lënë pas njërën prej dy ekipeve të tjera të rrezikuara, Teutën ose Kamzën.
Por megjithatë, pavarësisht situatës së krijuar, Kraja beson fillimisht te mbijetesa e Vllaznisë A.
“Mendoj që Vllaznia nuk do të bjerë nga kategoria, sepse është një ekip shumë i mirë, (rregullorja thotë qartë se ekipet me një emër A-B, nuk mund të luajnë në një kategori). Prandaj, besoj se do t’ia arrijmë objektivave, si A ashtu dhe B,” – shprehet Ervis Kraja.
Kategoria Superiore
Java e 30-të/ Të shtunën
Vllaznia-Luftëtari 0-2
Kamza-Lushnja 2-1
Dje
Laçi-Kukësi 0-0
Flamurtari-Teuta 3-1
Sot
Partizani-Skënderbeu 19:00
Klasifikimi
Skënderbeu 66
Kukësi 55
Luftëtari 47
Partizani 45
Flamurtari 43
Laçi 43
Kamza 37
Vllaznia 33
Teuta 33
Lushnja 10